WADAU WAPINGA MATOKEO YA KIDATO CHA NNE

Wadau wa elimu wameishushua serikali kuwa inawaongopea wananchi kwa kutangaza kuwa viwango vya ufaulu katika mtihani wa kidato cha nne vimepanda.

 

 Wakitoa maoni walisema ufaulu uliotajwa kuongezeka ni maelezo ya kisiasa na kueleza kuwa serikali ilichofanya ni kuongeza madaraja ambayo hayaijengi sekta hiyo.

 

Walikuwa wakizungumza na NIPASHE  kwa nyakati tofauti baada ya serikali kutangaza kuwa kati ya  wanafunzi 404, 083 waliofanya mtihani mwaka jana  235, 227 wamefaulu, ikiwa ni ongezeko la asilimia 58.25, ikilinganishwa na  185,940 sawa na asilimia 43.08 waliofaulu 2012.

 

Washirika hao waliitaka serikali kuboresha mazingira ya walimu ya kufundishia pamoja na nyumba za walimu , kuweka vifaa vya kujifunzia wanafunzi mashuleni badala ya kufanya siasa kwenye eneo hilo.

 

WALIOPATA SIFURI WAMEPANDA NGAZI KIJANJA

 

Waziri Kivuli wa Wizara ya Elimu na Mafunzo ya Ufundi, Susan Lyimo (Chadema), alisema kilichofanywa na serikali ni kuongeza ufaulu wa madaraja ambapo mwanafunzi aliyepata sifuri amepandishwa ngazi kijanja.

 

Alieleza kuwa kilichofanyika ni siasa; “wameona tumebakiza mwaka kuingia kwenye uchaguzi mkuu wameamua kuwapooza wazazi kupitia matokeo yaliyoongezwa madaraja, tusishabikie hili hata kidogo,” alisema na kuongeza:

 

“Maslahi ya walimu hayajaboreshwa, mazingira magumu ya kujifunzia na kufundishia leo tunaambiwa wanafunzi wamefanya vizuri haiingii akilini hata kidogo,” alisema.

 

Alikumbusha kuwa watu wamekuwa wakipiga kelele kuhusu elimu na kwamba matokeo haya yanadhihirisha kuwa ufaulu wanaoambiwa umeongezeka umetokana na kuongeza madaraja ya ufaulu, lakini ujinga  bado  upo.

 

Akizungumzia shule za umma kuboronga, alizitaka shule za serikali kujifunza kutoka kwa shule  binafsi ambazo mara kwa mara zimekuwa zikifanya vizuri kwa sababu wamekuwa wakichuja wanafunzi kupitia mitihani.

 

MFUMO WA ELIMU UANGALIWE UPYA

Mhadhiri wa zamani wa Chuo Kikuu cha Dar es Salaam, Profesa, Ruth Meena, akitoa maoni yake alisema kuna haja ya kutazama upya mfumo wa elimu kwa sababu uliopo unamtayarisha mwanafunzi kupata cheti na sio kujifunza na kuelewa masomo anayofundishwa darasani.

 

“Ule uwelewa na  utayari wa mwanafunzi kupokea kile anachofundishwa haupo, naona wanafunzi wengi wapo mashuleni kwa ajili wanajua mwisho wa siku watapata cheti, hawapo kwa ajili ya kuelimika,” alisema.

 

Kuhusu kufanya vibaya kwa shule za serikali, Profesa Meena alisema uwekezaji uliopo kwenye shule hizo ni kwenye majengo lakini vifaa, walimu havipo vya kutosha.

“Ni kweli zipo shule nyingi za kata zilizojengwa lakini hatujawekeza kwenye vifaa na  walimu,” alisema. 

 

Mbunge wa Nzega, Dk. Hamisi Kigwangalla, yeye anasema  matokeo hayo ni ya kawaida kwani siyo mazuri na wala mabaya na kwamba katika shule kumi bora hakuna hata moja ya serikali.

 

Dk. Kigwagwalla alisema ili kunusuru elimu serikali inatakiwa kuongeza motisha kwa walimu, kupunguza kero zao na walimu wenyewe wafundishe kwa bidii na kujitolea.

 

Pia alisema mabadiliko ya mitaala yaliyofanyika yaongezewe kasi na serikali itekeleza ahadi yake ya kuimarisha miundombinu ya kufundisha mashuleni.

 

TAHADHARI YA MNYIKA

Mbunge wa Ubungo, John Mnyika (Chadema), alisema ongezeko la ufaulu la asilimia 15.17 unadhihirisha tahadhari aliyotoa Oktoba 30 mwaka jana kuhusu mabadiliko ya viwango vya ufaulu yaliyotangazwa na serikali.

 

Alisema katika tahadhari hiyo alimtaka Waziri Mkuu, Mizengo Pinda, kuweka wazi kwa umma ripoti za uchunguzi zilizoundwa iwapo kupanda huko kwa ufaulu ni matokeo ya kuboresha mazingira ya kufundisha na kujifunza au  ni mabadiliko ya alama na madaraja.

 

HAKUNA KILICHOBORESHWA MASHULENI

 

Mwenyekiti wa Chama cha Walimu (CWT), wilayani Chamwino mkoani Dodoma, Amani Msanga, alisema kuwa serikali haina sababu ya kuwadanganya wananchi kuwa kiwango cha ufaulu kimepanda.

 

“Hakuna kilichoboreshwa mashuleni, huku ni kuwadanganya Watanzania  kwa kusema matokeo yamepanda lakini sifuri bado zinatawala” alisema Msanga.

 

 Msanga alisema pamoja na kuwepo kwa mpango wa Matokeo Makubwa Sasa (BRN) lakini serikali haijatatua changamoto zilizopo kwenye shule zake.

 

Mratibu wa Shirika la Marafiki wa Elimu mkoani Dodoma  (MED), David Makundi, alisema haoni kilichobadilika.

 

Makundi alisema kuwa madaliko ambayo yapo ni katika daraja la tatu na la nne ambayo hayana tija  kama daraja la kwanza na la pili.

 

Alisema mpango wa BRN bado haujatekelezwa kwa vitendo hivyo haoni ufaulu unaoelezwa kuwa umepanda.