TFDA YAPIGA MARUFUKU VIPODOZI VYENYE SUMU

Mamlaka  ya Chakula na Dawa Tanzania (TFDA) imepiga marufuku  viambato sumu visitumike katika kutengeneza vipodozi na kuzuia vipodozi 242 vyenye sumu nchini, vikiwamo  Carolight na Princess.

Lengo la TFDA kuchukua hatua hiyo ni kutekeleza sheria ya uthibiti wa vipodozi ili visitumike na kuleta madhara kwa watumiaji.

Afisa Uhusiano wa  TFDA, Gaudensia Simwanza alisema hayo alipokuwa akizungumza na waandishi wa habari jijini Dar es Salaam jana.

Alitaja viambato sumu vilivyopigwa marufuku kuwa ni Bithionol, Hexachlorophene, Zebaki (Mecury Compounds), Vinyi Chloride, Zirconium, Halgenated Salicylanilides na  Chloroquine.

“TFDA inaendelea ukaguzi wa vipodozi vilivyoko sokoni  na kupata sampuli mbalimbali na kuzipeleka maabara ili kujua usalama na ubora wake,” alisema.

 Simwanza alisema TFDA ilifanya ukaguzi  mwaka 2012 /2013 na kufanikiwa kukamata tani 34 za vipodozi visivyofaa vyenye thamani ya Sh. milioni 188.5 na kisha kuviteketeza.

Alisema hadi sasa mamlaka hiyo imethibitisha na kusajili vipodozi 3,968, na kuonya kuwa mtumiaji anapotumia vipodozi ambavyo havijathibitishwa na TFDA yupo kwenye hatari ya  kupata madhara makubwa. 

Aidha, alisema matumizi vipodozi vyenye viambato sumu hudhoofisha uchumi wa watumiaji na kwa nchi na gharama za matibabu kuwa kubwa katika kutibu madhara.